Қызылорда облысында Өңірлік кеңеске сайлау өтті
2025 жылғы 27-29 қаңтар аралығында Қызылорда облысы Кәсіпкерлер палатасының Өңірлік Кеңесіне делегаттарды (мүшелерді) сайлау өтті.
Қызылорда облысының Өңірлік Кеңесіне кандидаттардан өтінімдерді қабылдау 2024 жылғы 18-31 желтоқсанды қоса алғанда жүзеге асырылды.
Сондай-ақ, кандидаттар сайлау ережесіне сәйкес қосымша қажетті құжаттар дайындап, 31-желтоқсанға дейін Қызылорда облысы кәсіпкерлер палатасына ұсынды.
Тіркеуден барлығы 26 кандидат өтті, оның ішінде 16 өтінім салалық кеңес мүшелерінен, ал 10 өтінім аудандар мен Байқоңыр қаласынан.
Кандидаттардың үгіт-насихат науқаны 2025 жылғы 17-26 қаңтар аралығында өтті. Осы аралықта үміткерлер өздерінің және Палатаның ресми әлеуметтік желі парақшаларында сайлауалды бағдарламаларын ұсынды.
27-29 қаңтар аралығында делегаттарды (мүшелерді) Өңірлік Кеңеске сайлау өтті. Барлық кеңес отырыстарының сайлау барысын арнайы құрылған Қызылорда облысы кәсіпкерлер палатасының Өңірлік комиссия құрамы бақылап отырды. Комиссия төрағасы мен мүшелері білім, медицина, қаржы, кәсіпкерлік салаларының өкілдері, сондай-ақ олар қоғамдық қызметпен де қоса айналысады.
Байқоңыр қаласы мен 7 ауданнан және 7 салалық кеңестен тек бір адамнан өтетінін ескерсек, көп дауыс жинаған 15 делегаттың хаттамасы Атамекен Ұлттық Кәсіпкерлер Палатасының Сайлау комиссиясына жіберілді.
Ұлттық палатаның сайлау комиссиясы сайлау қорытындыларын белгілегеннен кейін делегаттар 4 жыл мерзімге Қызылорда облысы Кәсіпкерлер палатасының Өңірлік Кеңес мүшесі қатарынан көрінеді.
Өңірлік кеңестің мақсаты – экономиканың маңызды секторы кәсіпкерлікті өсіру, өркендету және нығайту. Өңірлік кеңес палата дирекциясына мемлекеттік билік органдарымен, үкіметтік емес, қоғамдық және халықаралық ұйымдармен өзара іс-қимыл жасауға, басқару органдары қабылдаған бағдарламалық құжаттарды іске асыруға жәрдемдеседі.
Пікір қалдыру:
Пікірлер: