«Кәсіпкерлер заңды сақтайды!» – «Атамекен» КӨП басшысы Павлодар бизнесіне қысым индексін жариялады
Павлодар облысының кәсіпкерлер палатасында өңірдің бақылау-қадағалау органдарының бизнес алдында жыл сайынғы бірыңғай есеп беру күні өтті. Іс-шараны Павлодар облысы әкімінің орынбасары Даурен Жамбайбек жүргізді.
.JPG)
Әкімшілік қысым индексін Павлодар облысының кәсіпкерлер палатасының директоры Ерқанат Абенов түсіндірді. Ол 2024 жылға арналған деректерді ҰКП орталық аппараты ұсынғанын, себебі кейбір мемлекеттік органдар әлі де 2025 жылғы қажетті ақпаратты бермегенін атап өтті. Бұл көрсеткіш бизнесті қорғау бойынша Бас прокуратура, Кәсіпкерлердің құқығын қорғау жөніндегі уәкіл және «Атамекен» ҰКП бекіткен кешенді жоспар аясында зерттеледі. Индекс әртүрлі бақылау түрлері және өңірлер бойынша статистикалық деректер мен бизнес субъектілерінің сауалнамалары негізінде есептеледі.
«Бақылау-қадағалау жүйесінің тиімділігінің негізгі көрсеткіштерінің бірі – тексерулер нәтижесінде анықталған заңбұзушылықтардың үлесі. Бұл көрсеткіш жоғары болса, мемлекет бақылау ресурстарын нысаналы әрі негізді қолданады деген сөз. Ал төмен болса – тексерулердің негізсіз жүргізілгенін білдіреді», – деп түсіндірді Ерқанат Абенов.
.JPG)
Индекс №1 – заңбұзушылықтар анықталған тексерулердің жалпы аяқталған тексерулерге арақатынасы. 2024 жылдың қорытындысы бойынша Павлодар облысында бұл көрсеткіш небәрі 36 пайызды құрады.
«Бұл да көп нәрсені аңғартады: тексерулер саны көп, бірақ олардың негізділігі төмен», – деді спикер.
.JPG)
Индекс №2 – кәсіпкерлік субъектілеріне қатысты профилактикалық бақылау шараларының жалпы тексерулерге қатынасы. Бұл көрсеткіш өңірде де төмен – 23 пайыз.
«Сонымен қатар, Сауда және интеграция министрлігінің тексерулерінің негізділігі – 70 пайыз, Экология және табиғи ресурстар министрлігінде – 80 пайыз. Бұл олардың айыппұл салудан гөрі алдын алу шараларына көбірек көңіл бөлетінін көрсетеді», – деп толықтырды ол.
.JPG)
Үшінші индекс – құқық бұзушылықтары аз жауапты бизнес. Көрсеткіш төмен болған сайын кәсіпкерлер заңға бағынады деген сөз. Павлодар облысы бойынша бизнес тарапынан заңбұзушылықтардың үлесі небәрі үш пайызды құрады. Бұл кәсіпкерлердің заңды сақтайтынын көрсетеді.
Сонымен қатар, ол бірыңғай есеп күні талқыланған басқа индекстерді де атап өтті. Мысалы, индекс №6 – бизнестен түскен өтініштердің қаралған барлық өтініштерге, шағымдарға, сұраныстарға және ұсыныстарға арақатынасы.
.JPG)
«Бұл үлес небәрі сегіз пайызды құрайды. Яғни, мемлекеттік органдарға 100 кәсіпкер жүгінсе, тек сегізі ғана жауап алады», – деді Ерқанат Абенов.
Сондай-ақ, ол №7 индекс – бақылау-қадағалау іс-шараларындағы бұзушылықтар үшін лауазымды тұлғаларға қолданылған әкімшілік шаралардың олардың жалпы санына арақатынасына назар аударды. Оның айтуынша, бұл көрсеткіш бар болғаны 2 пайызды құрайды.
.JPG)
«Бұл өте төмен деңгей. Мұнда екі индексті байланыстыруға болады: бизнестің өтініштерін қарау үлесінің аздығы және лауазымды тұлғаларды жауапқа тартудың аздығы. Бұл көп нәрсені білдіреді. Бизнес заңды сақтауға тырысады, ал қадағалау функциялары бар мемлекеттік органдардың көрсеткіштері, өкінішке қарай, онша жақсы емес», – деп түйіндеді ол.
Ерқанат Абенов Мемлекет басшысының кәсіпкерлікті қолдау жөніндегі тапсырмаларын орындау арқылы бұл көрсеткіштерді бір жыл ішінде жақсартуға болатынына сенім білдірді.
Павлодар облысы прокурорының аға көмекшісі Жандос Сағатбеков 2025 жылы прокуратура органдары шамамен 6000 кәсіпкердің құқығын қорғағанын атап өтті.
.JPG)
«Осы мақсатта біз уәкілетті органдарға 15 қадағалау актісін енгіздік, олардың негізінде 98 мемлекеттік қызметші тәртіптік жауапкершілікке тартылды. Бұдан бөлек, прокурорлардың наразылығы бойынша 40 әкімшілік іс тоқтатылды», – деді ол.
Құқықтық статистика және арнайы есепке алу комитетінің Павлодар облысы департаментінің аға прокуроры Шолпан Абенова 2025 жылдың сегіз айында 3468 тексеру тіркелгенін, бұл өткен жылдың дәл осы кезеңімен салыстырғанда 22,3 пайызға аз екенін айтты (2024 жылы – 4462).
.JPG)
«3468 тексерудің 1478-і жеке кәсіпкерлік субъектілеріне қатысты жүргізілді: ірі кәсіпкерлік – 270, орта кәсіпкерлік – 240, шағын бизнес – 352, микро-бизнес – 116», – деп нақтылады ол.
Бірыңғай есеп күні барысында кәсіпкерлер өз сұрақтарын қойды. Мұндай есеп беру күні кәсіпкерлер палатасында жыл сайын өткізіледі. Іс-шараға өңірдің бақылау-қадағалау органдарының басшылары мен өкілдері, мемлекеттік бақылау және қадағалау жүргізетін ведомстволар қатысты.
.JPG)
Пікір қалдыру:
Пікірлер: