Британдық «Reed Smith» заң фирмасының Астанаға сапары Қазақстанның халықаралық әріптестермен ынтымақтастығын кеңейтудегі маңызды қадам болды. «Атамекен» Ұлттық кәсіпкерлер палатасымен кездесу барысында инвестициялық жобаларды құқықтық қолдаудың, нормативтік базаны жақсартудың және заң практикасына цифрлық технологияларды енгізудің негізгі мәселелері талқыланды.

Қазақстан капитал тарту тетіктерін және стратегиялық әріптестікті дамыта отырып, халықаралық инвестициялық аренадағы позициясын нығайтады. Бұл бағыттағы кезекті қадам трансұлттық мәмілелер мен инвестициялық жобаларды құқықтық сүйемелдеу нарығындағы жетекші рөлге ие Reed Smith халықаралық заң фирмасының өкілдерімен кездесу болды. Талқылау кезінде инвестициялық ахуалды жақсартудың негізгі аспектілері, соның ішінде капиталды құқықтық қорғау, нормативтік реттеу және құқықтық салада цифрлық құралдарды енгізу мәселелері қаралды.

«Қазақстанның әлем бойынша 180-нен астам елшілігі бар, ал республиканың өзінде 80-нен астам дипломатиялық өкілдігі аккредиттелген. Бұл ресурс халықаралық бизнес-қауымдастықтармен және институттармен өзара іс-қимыл жасау үшін бірегей мүмкіндіктер туғызады», - деді «Атамекен» ҰКП Төралқа Төрағасы хатшылығының басшысы және Қазақстанның Сыртқы сауда палатасының Басқарма төрағасы Мұрат Қарымсақов.

Оның айтуынша, Сыртқы істер министрлігі атынан инвестициялар тарту жөніндегі оператор инвесторлармен үкіметтік деңгейде келіссөздер жүргізуде. Өз кезегінде, Қазақстанның Сыртқы сауда палатасы жобаларды сараптаумен, компаниялардың салық заңнамасын сақтауын бағалаумен, технологияларға сұранысты талдаумен және іске асырудың барлық кезеңдерінде инвестицияларды одан әрі сүйемелдеумен айналысады.

«Инвестициялық процестің ашықтығын арттырудың негізгі құралдарының бірі – Сыртқы істер министрлігі Ұлттық палатамен бірлесіп әзірлеп жатқан Ұлттық ақпараттық платформа. Бұл Қазақстандағы ішкі және шетелдік барлық инвестициялық жобаларды бақылап отыруға мүмкіндік береді», - деді Мұрат Қарымсақов.

Кездесуде Еуропа және Таяу Шығыс бойынша басқарушы әріптес Грегор Прайор ұсынған «Reed Smith» компаниясы қазақстандық бизнеспен ынтымақтастықты кеңейтуге қызығушылық танытты.

«Біздің фирманың әлемде 38 кеңсесі бар, оның 20-сы АҚШ-та. Біз жасыл энергия, IT және ағынды платформалар салаларындағы компаниялармен жұмыс істейміз. Біздің клиенттерімізге Netflix, Amazon және Disney кіреді.

Біз Қазақстанның бизнес-қоғамдастығымен ұзақ уақыт бойы өзара іс-қимыл жасап келеміз және ұсынылатын қызметтердің ауқымын кеңейтуге ниеттіміз», - деді Прайор.

Ол қазірдің өзінде Reed Smith-тің 25 ірі клиенті Қазақстанға инвестиция салып жатқанын атап өтті.

Мемлекеттік жүйенің айнасы ретінде құрылған «Атамекен» Ұлттық кәсіпкерлер палатасының құрылымы әртүрлі салалардағы жұмысты тиімді ұйымдастыруға мүмкіндік береді. Мамандандырылған бастамаларды қолдау үшін салалық бөлімдер ішінде жобалық кеңселер құрылды. Reed Smith-пен кездесу барысында тау-кен өнеркәсібіндегі инвестициялық жобаларды құқықтық қамтамасыз ету саласындағы өзара іс-қимыл мүмкіндігі талқыланды.

«Біз тау-кен өнеркәсібін дамыту бойынша жобалық кеңсені іске қостық, ол саладағы ірі компаниялармен және Өнеркәсіп министрлігімен бірлесіп жұмыс істейді. Оның міндеттеріне стратегиялық және нормативтік құжаттарды әзірлеуге қатысу, жекелеген пайдалы қазбалардың әлеуетін зерттеу, сондай-ақ, шикізатты өңдеуді кеңейту кіреді. Бұл заңнамалық тетіктерді жетілдіруді талап етеді, өйткені қолданыстағы нормалар жеткілікті икемді емес, ал құқықтық құралдар көбінесе жеткіліксіз», - дейді Басқарушы директор – «Атамекен» ҰКП тау-кен және металлуаргия кешені Департаментінің директоры Рустам Шунтуков.

Цифрлық технологиялар инвестициялық ортаны дамытуда ерекше рөл атқарады, бизнес-процестерді ғана емес, сонымен қатар транзакцияларды құқықтық қамтамасыз ету тәсілдерін де өзгертеді.

Reed Smith серіктесі, халықаралық арбитражға маманданған Люси М. Уиннингтон-Ингрэм автоматтандыру қазірдің өзінде заң тәжірибесін өзгертіп жатқанын атап өтті.

«Бұған дейін біздің жұмысымыз әрбір құжатты егжей-тегжейлі зерделеу және күрделі диаграммаларды құру болатын. Енді бізде құжаттарды автоматты түрде тексеру технологиясы бар, ол негізгі фактілерді бөліп көрсетуге, аналитикалық шолулар жасауға және нұсқауларды анықтауға мүмкіндік береді», - деп түсіндірді ол.

Оның айтуынша, қазіргі модель ағылшын тілді аудиторияға бағытталған, бірақ оны әртүрлі тілдерге, соның ішінде қазақ және орыс тілдеріне бейімдеу жұмыстары қазірдің өзінде жүріп жатыр. Болашақта мұндай шешімдер ірі компаниялардағы талдау процестерін айтарлықтай жылдамдатуға және олардың дәлдігін арттыруға мүмкіндік береді. Осылайша, әлеуетті кірісті жоғалту тәуекелдері де азаяды.

«Атамекен» ҰКП өз тарапынан British Kazakh Society сияқты серіктес ұйымдар арқылы қазақстандық кәсіпкерлерді британдық бизнес трендтеріне тартуға көмектесуге дайын екенін білдірді.

Айта кетейік, Қазақстан экономикасына инвестиция тарту мәселесі мемлекет пен бизнес үшін бірінші кезектегі міндет болып қала береді. Мемлекет басышсы Үкіметке 2029 жылға дейін 150 миллиард долларға жуық тікелей шетелдік инвестиция тарту міндетін қойды, бұл бизнес тарапынан жақсы қабылданды.

Кездесу қорытындысы бойынша тараптар қазақстандық бизнес пен халықаралық құқықтық серіктестер арасындағы одан әрі өзара іс-қимыл үшін негіз қалайтын ынтымақтастық туралы келісім жасау мүмкіндігін қарастыруға келісті.